_
_
_
_
_

Agadic hipoteca o futuro do audiovisual

A Xunta deixa no aire catro das cinco liñas de axuda para o sector

Até aquí chegou o modelo de apoio ao audiovisual que ensarillou o goberno bipartito. A Axencia Galega das Industrias Culturais (Agadic) vén de convocar oficialmente as axudas á produción de longametraxes, e segundo recollía onte o Diario Oficial de Galicia, coa mesma contía que en 2011, 2,9 millóns, e similar cadencia nos prazos: 150.000 euros para este ano, 600.000 para o que vén, 1,5 millóns de cara a 2014 e 650.000, por último, en 2015. O que non fixo de momento, e probabelmente xa non o faga no que queda de lexislatura, é abrir as outras catro liñas: a de contidos interactivos, a de desenvolvemento de proxectos, a de curtametraxes e videoclips e a de promoción do talento, que sumaban 675.000 euros. Sería como volver ao último mandato de Fraga.

A categoría de produción é a que nutre as empresas e películas de maior envergadura, e de aí saíron na convocatoria de 2011 filmes como Todo é silencio, de José Luis Cuerda, ou Traíñas, de Ángel de la Cruz, ambas en proceso. As de desenvolvemento de proxectos (200.000 euros) e contidos interactivos (210.000 euros) pretendían engraxar o sector e manter a actividade. As outras dúas eran as que redundaban na formación de novos cineastas, técnicos e públicos: tanto a de curtametraxes e videoclips (115.000 euros) como sobre todo a de promoción do talento (150.000 euros), que Oliver Laxe empregou para filmar Todos vós sodes capitáns (2010) e gañar o premio da crítica en Cannes.

Até agora, a orde de convocatoria era á inversa. Primeiro se publicaban as de menor contía, que son as que impulsan proxectos máis modestos e soportan prazos máis curtos, e ao final as de produción, sempre plurianuais e moito mellor dotadas economicamente. Dolores Ben, presidenta da Asociación Galega de Produtoras Independentes (Agapi), á que pertencen as empresas beneficiarias destas últimas axudas, sabía que ía ser así desta vez. “Consensuar talvez non sexa a palabra”, explica, “pero si que estabamos informados de que se ían abrir primeiro estas. O resto está no aire”.

O director de Agadic tampouco disipa as alertas. Juan Carlos Fasero admite que non se volverán abrir as outras catro liñas “tal e como estaban concibidas até o de agora”, pero tampouco pode asegurar nin cando nin como se van substituír. No mellor dos casos “intentarían convocalas” con outras condicións a final deste ano, e xa con cargo ao orzamento de 2013. Nova hipoteca, pois para entón a Consellaría de Cultura tería que facer fronte á terceira anualidade das axudas de produción de 2011, a máis elevada (1,74 millóns); á segunda das que acaba de lanzar, outros 600.000 euros; e así sucesivamente. A bóla de neve das débedas non deixaría de medrar.

Menor recorte sofren as subvencións ás industrias culturais, destinadas sobre todo ao campo das artes escénicas —antes, tamén ás musicais—, e que tamén se convocaron oficialmente onte. Pasan de 1,37 a 1,29 millóns de euros e introducen algunhas variacións no reparto dos fondos. Desaparecen as que impulsaban traballos discográficos (80.000 euros) e obras de mellora en estudios de gravación (25.000) e minguan as destinadas ás salas privadas, de 80.000 a 70.000 euros, e ao fortalecemento da actividade escénica, 700.000 euros fronte aos 850.000 de 2011. Increméntase só a partida de distribución de espectáculos, que sobe dende os 300.000 aos 450.000 euros.

Lo que más afecta es lo que sucede más cerca. Para no perderte nada, suscríbete.
Suscríbete

Regístrate gratis para seguir leyendo

Si tienes cuenta en EL PAÍS, puedes utilizarla para identificarte
_

Archivado En

Recomendaciones EL PAÍS
Recomendaciones EL PAÍS
Recomendaciones EL PAÍS
_
_